11:37
Выставка - ярмарка

Күһүҥҥү киһи күлбүтүнэн...

Күһүн аайы буоларын курдук, балаҕан ыйыгар үгэс буолбут күһүҥҥү быыстапка-дьаарбаҥкаларга кытынныбыт. 

Балаҕан ыйын  12 күнүгэр улуус учууталларын балаҕан ыйынааҕы мунньаҕын чэрчитинэн ыытыллыбыт  “Күһүҥҥү калейдоскоп”   диэн быыстапка-дьаарбаҥкаҕа ситиһиилээхтик кытынныбыт. Тэрээһин  балаһыанньа быһыытынан хас да түһүмэхтэринэн ыытыллыбыта. Улууспут оскуолаларын коллективтара бары даҕаны үрдүк таһымнаахтык бэлэмнэнэн кэлбиттэрэ. 

Биһиги оскуолабыт агропрофилированнай хайысхалаах буолан, үөрэнээччилэр, үлэһиттэр бары биир киһи курдук көхтөөхтүк эрдэттэн бу тэрээһиҥҥэ бэлэмнэммиттэрэ. Ол курдук бары түмсэн оҕуруот аһыттан араас кэнсиэрбэни оҥорон, тупсаҕай көстүүлээх гына киэргэтэн быыстапкаҕа бэлэмнээбиттэрэ. Оҕолор айылҕа матырыйаалын хомуйууга, араас оҥоһуктары оҥорсууга   көмөлөстүлэр. Барыта аҕыс уонча араас кэнсиэрбэлээһин оҥоһуллан  көрдөрүүгэ турда. Ону таһынан оҕуруот аһын араас көрүҥэ быыстапкаланна.

Бу сайын “Солнышко» лааҕыр оҕолоро Эбэ алааһыттан хомуйбут уонна оскуола учаастагар үүннэриллибит киһи доруобуйатыгар туһалаах отторунан чэй оҥорбуттара быыстапкаҕа турда. Чэйбитин “Алаас чэйэ» диэн ааттаабыппыт. Бу быыстапкаҕа кыттар үлэбит биир сонун хайысхата буолла. Кучу оту хатаран, моонньоҕон, дьэдьэн сэбирдэҕин, дөлүһүөн отонун, ромашка, мята оттору холбоон чэй арааһын оҥоьулунна. Маны таһынан оскуолабыт сайын устата мүөттээх ыҥырыаны көрөн-истэн, ылбыт бородууксайата атыыга, көрдөрүүгэ турбута.

Уопсай түмүгүнэн, «Самый большой овощ», «Домашние разносолы» диэн ааттаах номинацияларга бастакы степеннээх дипломант буолан, үөрүүбүт үрдээтэ.

Ол кэннэ балаҕан ыйын 14 күнүгэр  сылын аайы ыытыллар “Урожай-2019” улуустааҕы быыстапка-дьаарбаҥкаҕа ситиһиилээхтик кыттан “Сыл бастыҥ агрошколата» ааты сүктүбүт.

Аны ситиһии кынаттанан, балаҕан ыйын 28 күнүгэр Дьокуускай куоракка республикатааҕы тыа хаһаайыстыбатын быыстапка-дьаарбаҥкатыгар кытынныбыт. Манна республикабыт араас муннуктарытттан дьон-сэргэ тоҕуоруһа мустубута. Төһө даҕаны күһүҥҥү чаппарах ардахтаах, тымныы-тыаллаах буоллар, көрөөччү, атыылааччы, атыылаһааччы да элбэҕэ киһини сөхтөрбүтэ.  Биһиги оскуолабыт быыстапкаҕа  ас-үөл арааһын астаан итиэннэ оҥорон таһаарбыт бородууксуйатын көрдөрүүгэ туруорбута.

 

Просмотров: 198 | Добавил: Alexi7 | Рейтинг: 0.0/0
Всего комментариев: 0
Имя *:
Email *:
Код *: