Балаҕан ыйын 10 күнүгэр ини-бии Даниловтар уонна академик Афанасий Осипов үөскээбит, үөрэммит сирдэригэр Мытаах нэһилиэгин Бор алааһыгар  поэзия уонна уус-уран ойуу фестивала ”Бор көмүс күһүнэ” үрдүк тэрээһиннээхтик ыытылынна.

Көрсүһүүгэ Саха норуодунай суруйааччылара Семен Андреевич Попов-Тумат, Василий Егорович Васильев-Харысхал, поэт, государственнай бириэмийэ лауреата Николай Егорович Винокуров-Урсун, оҕо суруйааччыта Константин Ильич Сосин, Россий суруйааччыларын сойууһун бырабылыанньатын сэкэрэтээрэ Гаврил Гаврильевич Андросов, Россия худуоһунньуктарын сойууһун чилиэннэрэ, Дьокуускайдааҕы художественнай училище преподавателлэрэ Т.И.Маркова, С.П.Захаров, Дьокуускай куорат Хатас бөһүөлэгин бибилотекаларын үлэһиттэрэ ыалдьыттаатылар. Уруһуйга үөрэтээччилэр, улахан дьоннор, студеннар, оскуола оҕолоро хоһооҥҥо, ырыаҕа, уруһуйга күрэхтэстилэр.

Дьиикимдэ орто оскуолатын үөрэнээччилэрин, учууталларын күүһүнэн Бор алааһын бэлиэ сирдэринэн киэҥ хаабааннаах экскурсия тэриллибитэ кэрэхсэбиллээх. Ол курдук 1927с. П.В.Ксенофонтов салалталаах конфедералистар мунньахтаабыт, тиһэхтэрин тыын ылбыт дьиэлэригэр, Семен Данилов кэргэнигэр Анна Семеновнаҕа анаммыт “Анюта аллеята” диэн ааттаммыт сиргэ, сэрии кэнниттэн өрөспүүбүлүкэ араас муннуктарыттан кэлбит сэрии тулаайахтарыгар анаан тутуллан, элбэх оҕо, дьон тыынын өрөһүйбүт детдом дьиэтин оннугар норуодунай суруйааччылар Сэмэн, Софрон Даниловтар, норуодунай худуоһунньук Афанасий Осипов төрөөбүт олорбут дьиэлэригэр оҕолор кэлбит ыалдьыттарга, бу сирдэр историяларын, нэһилиэккэ, улууска, республикаҕа, бүтүн дойдуга туох сүдү суолу хаалларбыттарын сиһилии кэпсээтилэр.

Айар дьоҕурдаахтарга анаан “Бор алааһа” диэн темаҕа 4 строкалаах тутатына хоһоон айыытыгар күрэхтэстилэр. Барыта 16 хоһоонньут бэйэтин холонно. Уруһуйдьуттар Өрөспүүбүлүкэтээҕи пленер күрэхтэригэр биһиги оскуолаттан «Алын кылаас үөрэнээччилэрэ” группаҕа (11-13 саастаахтарга) - 1 место Вадим Максимов, 8 кыл., “Үрдүкү кылаас үөрэнээччилэрэ» (14-17 саастаахтарга) - 1 место Варя Григорьева, 9 кыл. ылары ситистилэр.